ليه صار حبك ممتلي بعيوب
والراس يابس والتكبر ليش
ترى التفاهم بالهوى مطلوب
والحب وحده ما يوكل عيش

أوقات أحس إنك علي مغصوب
يوم تجي وأيام فيه تطنيش
ما ينعدل حالك دهر مقلوب
ما ينعشق خل وعقله خريش

المشكلة إنك علي محسوب
والمشكلة إني معك بعيش
خوفي تضيعني بطول دروب
من بعدها أصفى على ماميش

احتار فكري فيك يالمحبوب
أنا معك من جد في تشويش
حاول تعدل فيك يا معيوب
خذني بهون وخل عنك الطيش