كملت دوني وعشت باقي حياتك
وأنا هقيتك لي بترجع من الشوق
في غيبتك ما تنقص إلا غلاتك
الدنيا ما توقف على فراق مخلوق

ياللي بطاري الحب والقلب فاتك
ما بيك ترجع لي ولو كنت مخنوق
بالذوق لو تطلب العين جاتك
ياللي فراقك كان خالي من الذوق

ياما تحملتك وزدت بقساتك
وأقول عادي كل مطرود ملحوق
لين السماء وصلتك وصرت ذاتك
وشلون قلبك هدني وطاح من فوق

كم قلت لك إحذر تغرك حلاتك
القلب عاشق ليش ما صرت معشوق
في غيبتك ما نلت إلا جزاتك
من هو لعب بالنار تاليه محروق