عمر والقلب متولع في حبك والهموم جبال
جلاد الهوى ماشي بكرباجه على صدري
أهذري بالوصال وما ورى درب الفراق وصال
ويا خوفي يضيع العمر في غيابك وأنا أهذري

أسميك المطر قل ليش؟ لأجل أفوز بالهمال
وأشوفك تنهمر في أرض ربي ما تيجي قفري
أسميك القفر قل ليش؟ لأجل أطرد سراب اللال
وأموت من العطش وأرتاح من ذلي ومن قهري

أسميك البحر قل ليش؟ لأجل أصارع الأهوال
وأقول إن البحر غدار لكن للأسف مغري
أسميك الفخر قل ليش؟ لأجل أحط لك تمثال
وأجاوب كل من يسأل هذا اللي كسر ظهري

أسميك القهر قل ليش؟ لأجل أجر لك موال
وتبكي إنت والعذال والعصفور والقمري
أسميك الفجر قل ليش؟ لاجل تحطم الآمال
وتاخد في طرف فجرك أول شعشعة فجري

أحس إني أسيرك وأشتري في بعدك الأغلال
سهر ودموع ومناجه نجوم وكوكبٍ سحري
أسميك السهر قل ليش؟ لأجل تزيد بي غربال
وتترك لي حنين العمر فيني قبل ما تسري

أسميك القمر قل ليش؟ لأجل أكايد العذال
أوريهم محاسن من قصف عمري وحفر قبري
أسميك العمر قل ليش؟ لأجل أشياء ما تنقال
مثل واحد يبيع العمر وواحد ما يبي يشري