أنا والله مدري وش تبي يا الثاير الزعلان
تظن بلادنا ترجيك أو إن شيوخنا تخافك

صحت نجد على صوت العويل ولجة الغربان
عوافي قربي منك الوسادة وأدخلي لحافك

كأنك ما تعودتي على التجريح والنكران
من اللي زادهم في ما مضى من لحم أكتافك

تغطي ما عليك إلا الرضا ورعاية الرحمن
صياحٍ ما يساوي طلتك من راس مشرافك

نحسب إيران تكرهنا وكثيرٍ في الهوى إيران
عسى يفداك من حب وعسى يفداك من عافك

متى يا قبلة الدنيا عرفتي الذل والحقران
ومنهو اللي تجرا يقهرك أو يكتف إكتافك

عليتي يا عماد الدين وجمرة شيمة الفرسان
كثير الظلم ما ضرك ولا هو سرنا إنصافك

ولو كسب المعارك هرج سادوا غيرنا عربان
نبا سيف الحروف وما نبت في الحرب أسيافك

تهاوى عرش كسرى وإنتهت سطوة بني عثمان
وانتي مثل خشم طويق في عزمك وميقافك

تبي سلمان ناظر في السما كانك تبي سلمان
تخيب يديك ما طلته ولا طالوه أسلافك

أنا والله مدري وش تبي يا الثاير الزعلان
تظن بلادنا ترجيك أو إن شيوخنا تخافك