على طاري الفراق اللي طرالي بسيرتك اللحين
وعلى طاري الجروح اللي طرت لي وجيت في بالي
دخيل الله هالطاري طلع لي فيك بس منين
دخيل الله مو وقته وأنا تعبان في حالي

أنا من وين أبدي لك معاك وإبتدي من وين
تبي أبدي من أول جرح أو العاشر أو التالي
بصراحه ما توقعتك تحطم قلبي المسكين
ولا حتى توقعتك تدفعني الثمن غالي

معك قلبي قضى عمره على النيه عمر وسنين
وأنا ما غير اتأمل على الله ترأف بحالي
معك أوضح من الواضح ولا ألعب على الحبلين
وأنا هذا الأمر قبل أرفضه ما مر في بالي

قبل ما كنت تلقاني إذا ناديت وأمد إيدين
لأنك تدري الطيبة بقلبي أردى أفعالي
تخيل كنت اتأمل تجي وتسال علي بعدين
لأني قلت بغيابك فال الله ولا فالي

وغلاتي عندك إنك ما تخبي بخاطرك أمرين
طلبتك واللي يرحم والدينك قول يالغالي
الأول تكفى علمني وشاللي بخاطرك واثنين
من اللي أشغلك عني وأشغل قلبك والي

وأحس بصدمتي سكين يا عمي أي سكين
أحس بضيقة الدنيا تضيق بضيقة احوالي
بعد ما شفت صدماتي على الدنيا من الغالي
بديت الحين أتوقع تجي الصدمة من إظلالي