ستل جناحه ثم حام يرقى على متن الهوا
يزفه بعيد وأنا محدود في حد النظر

له بالهوا شف ومرام يلعب مع الغيمة سوا
ولا جناح لي وأطير والأرض صارت لي مقر

طيري ضرب جو الهيام ولو دعيته ما التوى
عزي لمن طيره غدا ولا له من أمره مفر

فكري تغشاه العسام أمسيت وفكري ما ضوى
الأرض قفر من الونس والليل من فرحي قفر

شبيت ضوي بالظلام في صحصح ذيبه عوى
ما لي أنيس إلا النجوم أو نور وضاح القمر

خالي وكأني في زحام قلبي تلهب وانشوى
ما عاد أميز بالحشى ولا على الضو الجمر

وين أنت يا داعي سلام وين أنت يا بايع دوا
ردوا لي النومة ترى بالعين جلاد السهر

دورت بالشدة حزام ولا لقيت اللي قوى
يا الله دخيلك ما لقيت اللي نشد به الظهر