في حد ساعات بيكون جنبك ومبتشفهوش
متحسش أبداً بوجوده مع إنه قريب
وفي حد يفارق ويسيبنا إنما بيعيش جوا قلوبنا
وتغيب الشمس إنما إسمه عمره ما بيغيب

في فرق ما بين جسم بيمشي وروح مبتمشيش
واللي إنت أكيد سايبه ما بينا ضد النسيان
فرحت كتير وأهو جيه دورنا
ومعاك هنكمل مشوارنا
أصل مفيش في الدنيا دي أغلى من روح إنسان

وعشان أجيال بعدنا جايين
يفضلوا فاكرين يفضلوا عارفين
وعشانك حتة منا وعشان تفضل ما بينا
يفضل إسمك معانا سنين وسنين

وعشان أجيال بعدنا جايين
وعشان مش عايزين نخسر ناس تانيين
هنمدلهم إيدينا وهنديلهم عينينا
إحنا إخترنا الطريق ده وفيه ماشيين

طول عمرك بتحس وجعنا ومن غير ما نقول
بنعيش الدنيا بإحساسك بنشوف بعينيك
وعشان من قلبنا بنحبك هنوصل حنية قلبك
للناس اللي ما نسيوش حبّك وإتعلقوا بيك

وعشان أجيال بعدنا جايين
يفضلوا فاكرين يفضلوا عارفين
وعشانك حتة منا وعشان تفضل ما بينا
يفضل إسمك معانا سنين وسنين