خذيتني كلي دلال وتغلي
نشفت ريجي ما يفيد العتب فيك
تزعل علي ساعه وترجع تهلي
نفس الطريق اللي يجيبك يوديك

شاخذ من عتابي عليك وش أخلي
تخطي بحقي واتنازل وأراضيك
والله مالك غير شمسي وظلي
مع كل هذا تملك القلب بإيديك

لو تطلب اللي تطلبه جيتك كلي
غالي عسى الله يحفظك لي ويهديك
ماني مقصر وإن تخاذلت قلي
والله لا أحطك في عيوني وأداريك

من ذاق مر الحب لازم يحلي
مرمرتني في عيشتي وين حاليك
خلي العناد اللي براسك يولي
أخاف لا تصغر بعيني وأخليك