أحبه وهو مني بعيد
إذا قرب مني شوي حبه علي يبعد
والشك والغيرة تزيد
وينقص العاذل كلامه فيه ويزيد
والمزح يرجع جد وتضيع الطريق الجادة
لا ما يدوم الحب الا لبتنى عالقاعدة

كلمه بصندوق البريد
يرتاح قلبي منها و لواعجة تبرد
وتلين القاسي الحديد
وتقيم ميعاد اللقاء الميمون وتحدد
وتقرب المبعد يواعدنا ونا با واعده
لا ما يدوم الحب الا لبتنى عالقاعدة

هذا هو الراي السديد
اللي يجيني منه يكفيني وبس ويسد
لو تهنئه في يوم عيد
والا زيارة خاطفه من غير أي موعد
القصد يبقى الود ما نبغى نكد ومعاندة
لا ما يدوم الحب الا لبتنى عالقاعدة

ولا ظهر منه جديد
عله يجد في الحب ان كانه يبانا جد
نباه من نوعه فريد
واللي يحب صاحبه له دون البشر يفرد
وان حد حسد يحسد على رغم العيون الحاسدة
لا ما يدوم الحب الا لبتنى عالقاعدة