أنا العالي على راس السما مركاي
أبد ما ينحني راسي سوى لله
أطول الصعب والنايف على يمناي
عزيز وما رضيت لنفسي الذلة

جبل شامخ ولا يقدر علي أعداي
أشيل الحمل لو ما به أحد شله
بشر وأخطي وما أنكر في يوم أخطاي
محد فينا أبد خالي من الزلة

على درب النقا باقي على ممشاي
أراعي الحق لو ناسه بقوا قله
أصون اللي رغم ضعفه وقف وياي
وأعين اللي لفى يشكي من العلة

على هالناس ما توقف أبد دنياي
ومن يضمن أبد ما يغدره ظله
معاي الله ولا أفكر وش اللي جاي
أبد ما أخشى الزمن وأنا معاي الله