تجيني حلم بين أغفى وبين أصحى على طاريك
وبين الله يجيبك لي وبين أرجوك لا يهمك
تعال وقابلك ربك تغلى عند من يغليك
تعال وكلي أشواقٍ تبيك وقلبٍ يضمك

لك الأصدق من شعورٍ وفا لك قبل ما أوفيك
إلين أصبح معاك العشق ورد أقطفه وأشمك
أنا ما زان لي ممسى بلا شوفك ولمس يديك
يروح العمر وعيوني تخايل طيفك ورسمك

أنا ما كنت لك عابر أنا أول من سعى يرضيك
أنا الأولى على قلب نبض بحساسك وباسمك
أنا من كثر ما أحبك أحس الحب متعديك
وصلت لسابع أجدادك أبوك وأهلك وأمك

بجي لك من ورا ظهر المسافة خطوة ترجيك
وإذا إن الأرض ما شالت خطاها سقتها يمك
على الفجر الجديد اللي عزفك وما قدر يحكيك
بغافل خطوة الفرقى إلين أحضنك وألمك