أكون خاتم في صباعك
وتعمل فيّا ما بدالك
تجيني وقت ما تجيني
تسيبني لمّا يحلالك

ولو راحتك مع دموعي
عيوني تبكي وتزيدك
وأسيب عمري وأيامي
رهن إشارة من إيدك

أجل كل أحلامي
عشان توصل لأحلامك
تكون الآمر الناهي
لازم أمشي ورا كلامك
و لمّا تخوني أعديها
وأقول سامحي عشان بيتك
وأصدق لمّا بتقولي
أنا من قلبي حبيتك

وأدوس على قلبي وكرامتي
عشان إنته تكون راضي
و لمّا تقل من قمتي
ما أركزشي وأقول عادي

حاجات وهمية ومريضة
بتتمناها في خيالك
ومش ممكن في يوم تحصل
وبيصدقها إحساسك

وقبل أما أمشي في كلمة
أخيرة عايزة أقولهالك
أنا مش جارية ولا عبدة
أنا ستك وتاج راسك