افترقنا وانكسر خاطر وخاطر
وإنت قلبك ما رحم قلبي العليل
في عيوني كم ألم خافي وظاهر
والرضا في بسمة شفاتك دليل

بالسلامة روح يا غادر وغادر
وين ما حبيت ونويت الرحيل
دام قلبك صار على النسيان قادر
القدر محدٍ يرده مستحيل

كل شي في الكون له أول وآخر
والوفي يحفظ من الذكرى جميل
كل واحد له أحاسيس ومشاعر
بس أحد وافي وأحد قاسي بخيل

كم وكم لأجلك تحديت المخاطر
ما هقيت إنك تبدل بي بديل
ما أريدك بعد هجرانك تبادر
بالوصال وتذكر إني لك خليل

قلبي اللي كان في حبك يفاخر
ما وقف دمه من طعونك يسيل
كيف ترحم وإنت لك قلب يكابر
حتى ولو دمي على كفك يسيل

مستعد أخسر حياتي وأي خاطر
بس أموت بعزتي وما أحيا ذليل