إحكي بهمسك حبيبي توها تغفي جروحي
لا تصحيها ترى تنويمها عندي صعب

ليه متأخر حضورك راحت أيامي وروحي
لي ثلاث سنين بحدادي على قول العرب

أحرجوني في سؤالي عنك وما أقوى أبوحي
كل ما قالوا لي وينه قلت ما ربي كتب

إيش أجاوب وإنت داري عارف الحال بوضوحي
من يصدقني إذا قلت الفراق بلا سبب

توها تنزل دموعك جعلها تكفير نوحي
الله يسامحك ما أبي أدعي بلحظة غضب

صرت ماضي في حياتي وإنت بالماضي طموحي
دارت الدنيا وياما دارت الدنيا عجب

خذ جنودك من خفوقي ما بقى لك بي فتوحي
جيشك اللي ما رحمني بعد ما فاز إنغلب

لا تجيني ودي تنسى دربي وترحم جروحي
خلها تغفى طلبتك هذا هو آخر طلب