يا مدور الهين ترى الكايد أحلى
اسأل مغني كايدات الطروقي
الزين غالي لكن الأزين أغلى
ولكل شرايً بضاعة وسوقي

النو عالي والسما فوقه أعلى
ولا فاق علماً جاه علم يفوقي
الصعب هلّا قلت يا صعب سهلا
دامك تبيني فأنت يا صعب شوقي
أحب عسف المهرة اللي تغلى
وأحب أروض كل طرفٍ يموقي

وأحب أسافر مع سحاباً تعلى
وأحب فوق الغيم لمع البروقي
وأحب أسامر بدري اللي تجلى
وأرسم شعاع الشمس عند الشروقي
يا من على ثاير فؤادي تولى
خلك على قلب الكرامة شفوقي

أكرم عزيز بالعمر ما أستذلا
يسوق عمره للمشاريف سوقي
اخترتك من الناس للقلب خلا
يا حيثك مرادي وكيفي وذوقي
ما رحت أدور كل زولٍ تحلى
لولاك تسوى ما عطيتك خفوقي