لو يبور الملا محسب حبيبي يبور
وأحسب إني أموت ولا يموت الوفا

وأحسب إنه على هاك المودة غيور
ما أحسب إن الشعاع اللي بقلبه طفى

كيف يا نور عيني وإنت للعين نور
يختفي نور وصلك في ظلام الجفا

أثر قلبك على فرقى الولايف جسور
وأثر طرفك إلى سهرت عيوني غفى

وين هاك الونين اللي يشق الصدور
وين هاك الدموع اللي تشق الصفا

كل حي إلى دارت لياله يدور
وكل قلب إلى عفت عروقه عفى

ويل قلب توالت فوق جرحه كسور
كن جرح الهوى يا صاحبي ما كفى

ألتمس لك عذر لو كان ما إنت معذور
وإن جحدت المودة بان لك ما خفى