لو سألني الورد عنك علميني ويش أقول
وإن وصفت أول جمالك كيف أبوصل آخره

وإنت روضه من حلاها كحلت عيني الفصول
رقتك ورده وروحي كالطبيعة الساحرة

عذبة الأطباع وأكثر إنت يا العف الخجول
من لفيت الدنيا وإنت مثل غيمه ماطره

عالية أصل ومطرها كل ما جاد بنزول
مثلها إنت كريمة وهي مثلك طاهره

ميزك ربّي بملامح زادها نور وقبول
وبعيون منها غارت ألف نجمه ساهره

هذا غير الشمس ياللي جاها من حسنك ذهول
واكتبت في مدح زينك لين صارت شاعره

مذهله في كل حاجه إنت يا بنت الأصول
في هدوئك في كلامك والمعاني العاطرة

لك تفاصيل ابتسامه تأخذ ألباب العقول
بارده عالقلب كنها نسمه حلوه عابره

هذا إنت وما أبالغ لو أقول إن العذول
من كثر طيبك دعا لك بالسعادة الغامرة

صدقيني إنت غير وصدقيني لو أقول
إني يا روضة زمنا إنت حاجه نادره