أنا عاشقة ومَبقولهاش
بخاف من قلبك القاسي
وأخاف يخدعني إحساسي
وأنا مش حمل جرح جديدة
وأشوف صورتك في عين الناس
يعيش قلبي مع الحيرة
وأموت يا حبيبي من الغيرة
أقرب ولا أروح لبعيد

وبتعدي السنين
وأنا بين البينين
لا أنا قريبة ولا بعيدة
ولا نهاري باين له عينين

يا ريت عندي لقلبي بديل
ومش علشان ينسيني
لكن علشان يقويني
في لحظة ضعفي مَيسبنيش
أنا الفرحة اللي مَبعيشهاش
ما بلمسهاش في أيامي
بشوفها يادوب في أحلامي
بموت والإسم إني بعيش

وبتعدي السنين
وأنا بين البينين
لا أنا قريبة ولا بعيدة
ولا نهاري باين له عينين

وأقول أنساك عشان أرتاح
وعمال قلبي بيدافع
وحتى الصبر مش نافع
أنا مش عارفة أعمل إيه
ويوم عن يوم جراحي تزيد
ويكبر شوقي جوايا
ما ترحمني بقى كفاية
تعبت خلاص من اللي أنا فيه

وبتعدي السنين
وأنا بين البينين
لا أنا قريبة ولا بعيدة
ولا نهاري باين له عينين