مجرد شيء في قلبي قبل لا أعلن الترحال
كلام بخاطري ودي أقوله وغص به بوحي
ولابي شيء أبد منك دقيقة وكلمتين إعجال
كلام آخر حكايتنا وآخر صدقي ووضوحي

تذكر إني خليتك هذاك اللي ولا ينطال
تذكر إني بديتك على نفسي وعلى روحي
تذكر إني سلمتك مفاتيحي مع الأقفال
تذكر إني حبيتك كثر ما أهديتني نوحي

سبق وإن قلت لك إحذر ترى عزي يهد جبال
ولا صدقتني والحين طحت من عالي إسطوحي
رسمتك في خيالي شيء ولا حتى طرى ع البال
إلين أصبحت لي لا شيء وكسرت أقلامي ولوحي

ولاني بندم وبزعل وأحمد الله على كل حال
من الدنيا أبتعلم وبرقى عالي صروحي
ولكن بكره تلقاها وتتبدل بك الأحوال
فلا تستغرب وإعرف تراها دعوة جروحي