ما نقصني شي غير إني أشوفك
ودون شوفك ناقصه أشياء كثيره

تعرف ظروفي وأنا ما أعرف ظروفك
والزمن مدري متى يصحى ضميره

إنت لي ديره رغم إحساس خوفك
ورغم كل اللي حصل لي إنت ديره

كيف أبروى كل ما أسمع حروفك
وكل ما أسمع علم منك أشتاق غيره

وكل ما حطيت بكفوفي كفوفك
أشعر إن الأرض ما هي مستديره

كيف أجازي طيب قلبك وامعروفك
وغير سيرتك إنت مالي أي سيره

والسؤال اللي أبي يسبق حلوفك
ومتأكد يرجع الغايب مصيره

هي متى عيني يجي يوم وتشوفك
ناقصتني أشياء من دونك كثيره