أنا كلي أسف للي بدر مني من ألفاظي
قسيت بردة أفعالي وزودت العيار شوي
أنا ما جيت أعاتب بالملام وأفتح الماضي
مفاتيح العفو عندك عسى به من نصيبي شي

خذتني عزتي بإثمي وعينت الزعل قاضي
حكم لي بالجفا عنك وأنا قلبي صرخ لي عي
تحسب إني قدرت أنساه ترى كله حكي فاضي
أنا مقفي وفي نفسي أقول الله يرده لي

أنا قاعد على بابك إلين تقولي راضي
تبيها عام أو ليلة تدلل ما ورانا شي
أبقعد لين تنصفني وتغفر ذنبي الماضي
أفضل أخسر الدنيا ولا أخسرك لو شوي

حبيبي لا تعنيني مريض وبانت أعراضي
تعبت من الشعور اللي لا أنا ميت ولا أنا حي
متى ترجع سعادتنا وترجع شمسنا تضوي
كريم إنت وأنا أستاهل وأكيد إنك بتغفر لي