بعيني تغيب الشمس وتشرق بعيني
في ناظري للشمس موت وميلاد
لليل في دمعي سنا نجمتيني
وللصبح في جفني شفق هم وسهاد

كن السهر دربٍ عليه إبتجيني
ولا ودي أقطع درب لاماك برقاد
ياللي جميع الناس بينك وبيني
كل لحظة أبنتظر منك ميعاد

عذري ليأسي منك إنك تبيني
خنت الرجا وإن صنت لي عهد ووداد
لمصافحك ربي خلق لي يميني
أمدها لك وصل وأمدها أبعاد

ولبسمتك ترخص غوالي سنيني
همي يزول وصادق الشوق يزداد
أنسى عذاب العمر منسى حنيني
تبلى ليالي العمر وجروحك جداد