العين تدمع من فراق العزيزين
على الملوك أهل السعد والشهامة
أبوي وإخواني كرام الحجاجين
عسى الذي يلومني للملامة

حنا سلاطين ونحكم سلاطين
لنا على الدنيا وأهلها زعامة
دون الوطن حنا سواة المجانين
يا زين هدت خيلنا في العدامة

بالسيف الأملاح نشطر القوم نصفين
من الزبير إليا قاصي تهامة
وأنا وريث العز فعل وبراهين
قولٍ بلا فعل خزي وندامة

إحجاب نجد وسعدها في الميادين
حنا الفخر حنا السعد والكرامة
حنا هل العوجا عام المعادين
حنا سحاب الخير حنا الجهامة

هاذي بيارقنا تهز العدوين
في ساحة العرضة نزيح الغمامة
أهز سيفي لو بكاء القلب والعين
أخفي عظيم الحزن خلف ابتسامة

طروا علي اللي حشام وكريمين
معزي وخالد وفيصل أمامه
فهد وأبو خيرين راحوا على الزين
ومحمد وتركي وباقي عمامه

وعبدالله اللي راح والشعب باكين
على الغياب الله يحلل عظامه
وسلطان كنه راح من قبل يومين
اللي فرض على الجميع إحترامه

ونايف نصير السنة وناصر الدين
جرد على رؤوس الخوارج حسامه
الملتقى في جنة الخلد أمين
وأنا بهز الكون وأكشف غمامة

تبكي عيوني من فراق العزيزين
على الملوك أهل السعد والشهامة
أبوي وأخواني كرام الحجاجين
عسى الذي يلومني للملامة