لا باس يالمحبوب روحي تفداك
لا باس يامضنون عيني حبيبي
يا عل ربّي يا هوى البال يا قاك
من كل شر وكل جرح عطيبي

يا ليتني خذت المرض عنك ما جاك
وتصير من بد الخلايق طبيبي

ترى حياتي ما تهنى بلياك
ليتك دوامً عند عيني قريبي

يا ليتني نسمة صباح بدنياك
ألثم جبينك عقب طول المغيبي

أو ليتني طيفً يزورك بممساك
وأشاهدك وأقول يا نفس طيبي

بالحيل أحبك وأعشقك وأتمناك
يشهد على ما أقول دمعً سكيبي

أنا دخيلك لا تطوّل بفرقاك
رد لعيوني نومها اللي حريبي