حي الصباح اللي لنا شع نورة
أهلاً هلا به ما حلا فجر الأعياد
صبح سنا نورة من إحساس نورة
كنه صدى الهتان في حس رعاد

صبح تغنت بالبشاير طيوره
فيه الفرح والخير والطيب يزداد
لو غنت الشعار بالفين صورة
ما يبلغ أوصاف الحلا قاف قصاد

بالكاد روض الشعر بقطف زهوره
وأبستعير البدر هالليلة مداد
وأهدي طروق الشعر وأهدي بحوره
يوسف ولميا يوم في فرحهم جاد

نورة ظفرتي بمن وفا لك شعوره
محمد رفيع المنزلة نسل الامجاد
لايق على قلبك هناه وسروره
قلب لطيبه من على روس الأشهاد

ما الوم فيك النجم لو شع نوره
في ليلة حسنك بصدر الغلا ساد
معاني الأشعار فيك معذورة
والشعر له في فرحكم خير ميعاد