ما هي قضية حب موضوعي أكبر
أنا مع الأيام موضوع ثاني
مدري غرقت اشلون وأنا على البر
وش راح مني وش بقى من أماني

لا طبت يا قلبي ولا هو غدى الشر
برضاك ولا غصب عنك دعاني
مر الزمان اللي عن الأنياب كشر
ما عاد خلا للبلابل أغاني

إلى متى وأوراق عمري تبعثر
بين الرحيل وبين غربة المكاني
كريم يا حزني يجي منك أكثر
بخيل يا فرحي وحظي أناني

إذا اعتزلت الناس قالوا تكبر
وإذا بديت الطيب يخسر رهاني
العين مخلوقه عشان تسهر
والليل جاملها وطول عشاني

يذبل زهر وأغصان عمري تكسر
تعصف بي الونّه تزلزل كياني
لا بارك الله فيك يا الحظ الأقشر
اللي على ضيم الخلايق حداني

الحلم بعيوني على دمعي أبحر
غادر وخلالي عذاب المواني
هذا العمر عدى وهذا هو السفر
عن مقتل إحساسي وصابت حناني