يا قلبي من الخطا تعلم
وحاذر قبل تتكلم
احسبها لاجل ما تندم
دامك عادك بحسك
وقبل ما يعلموك الناس
علم نفسك بنفسك

لا يصير منك أي خطا لا يصير
ويلحق غلطتك تبرير
وعنك يهمسوا تزوير
واحذر لا الأذى يمسك
وقبل ما يعلموك الناس
علم نفسك بنفسك

جامل قد ما تقدر وخلك
خلك حالي المعشر
لين بس لا تعصر
وذاكر قبلهم درسك
وقبل ما يعلموك الناس
علم نفسك بنفسك

وإذا صك الفرج بابه
وضاقت كل أسبابه
والهم كشر أنيابه
حسك تشتكي حسك
وقبل ما يعلموك الناس
علم نفسك بنفسك