يا العزيز اللي نويت تعز نفسك عني
بعد ما عزك خفوقي وبعد ما عزيتك

إبشر بعزك حبيبي لاجل تعرف إني
مثل ما لبيت وصلك في الجفا لبيتك

يا عزيزي إنت تآمر قبل تطلب مني
كيف لا وإنت على كل البشر بديتك

ما أردك قرب ولا بعد يا مجنني
لو على روحي تأشر والله ما رديتك

طاعتك واجب على قلبي وعلي لأني
مثل ما تبغي حبيبي في المحبة جيتك

حسن ظنك في محله ولا اختلف بك ظني
راح أحقق أمنياتك كثر ما تمنيتك

عشت أنا السبع السمان اللي معاك وكأني
ببدأ السبع العجاف وغنوتي حبيتك

المهم إنك حبيبي عايش ومتهني
وإلا أنا بموت من بعدك ولا ناديتك

جرحك الغالي بنزفه من جفاك يغني
منه حن أطرافك الترفه إذا لاقيتك

لا تقل للناس جرحي قل لهم متحني
قل لهم إني بدمي يا الغلا حنيتك