لا الوقت يوفي لي وعد حبك ولا راضي تخون
أتعبتني كفك أغاني صبح وظروفي دجا
أقرب من حدود الوهم وأبعد من حدود الظنون
لا قاطعٍ فيك الأمل مرة ولا لي بك رجا

لا جيت أبي قرب الهوى تطربقت من كل لون
ولا جيت أبي أبعد عنك وإلا اللي لجابي قد لجا
كم جيت أهونها على نفسي وعيت لا تهون
لا مركبي يغرق وأقول ايأس ولا هو اللي نجا

وش في يدي غير إني أرسم قصتك صبر وعيون
وش في يدي لا في يدي صوتٍ وهو يبكي شجا
نعم وابطعن خاصرة وقت مشبعني طعون
ثار الهوى ما تاخذه غير أغنية عاشق سجا

أطرد من همومي وأحس هموم غيري يلتجون
واشوفهم هذاك جا هذاك جا هذاك جا
وأقول حي الله من جانا واغنيك بجنون
المسألة عدت دروب المدح ودروب الهجا