لا باب مسايف ولا باب مهجوج
ما عاد يمدي يقفل الباب مزلاج
قد روحت به رياحك الصايله الهوج
راحت معه روحي قبل باب وسياج

ياللي حنانك فوج يستلحقه فوج
أضويت في صدري عقب حزني سراج
يا عنك أحبك حبٍ يسوجني سوج
ولك فالسما دلوٍ على الروح هداج

كم كحلت عيني على الصبر مدعوج
وتجملت روحي رجا الغم ينباج
لا ما حسبت الوقت يذخر لي بروج
ولا ما حسبت الحزن يكتب له افراج

يا غالبٍ ظني عن الناس بفجوج
فجوج خير مزنها يصب ثجاج
يا ناهبٍ كلي غدا القلب مخجوج
نهبت كل الطيب ما همك إحراج

وجهك نصيبٍ لي يبو ثغر مبهوج
واسمك كتبه الله علي يومي أمشاج
لا صار حبّك في الشرايين مدهوج
أرفق على قلبٍ يحبك و محتاج

أستعشب بروحي وفضلوعي العوج
وأمطر على روحٍ صهدها كما الصاج
هذا قدر ربي به الحق منسوج
نلبس قدرنا بالرضا و ندرج إدراج