سالمين
يسلم لنا هذا الوطن وبقوة الله سالمين
ما تنحني أرض الشرف سبحانه اللي صانها
هذا الوطن في أرقابنا دين على طول السنين
يعيش وتبقى راية البحرين طول أزمانها
حنا حزامك يا حمد ازهل يا سيد العارفين
المملكه برجالها لا ولعت نيرانها
الله خلق فينا عزايم في الشدايد ما تلين
الخيل من خيالها وإنت بيديك عنانها
ابشر بعزك يا وطن في كل موقف صاملين
صملة رجال في الصعيبه ما تخون أوطانها
ابشر وحنا عالعهد نبقى الرجال المخلصين
اللي تسوم أرواحها أليا احتمى ميدانها
أرض عليها شعبها متكاتفين وآمنين
تصعب على عدوانها وأهل الوفا جدرانها
دار نعيش بعزها وشعب بها متفاخرين
الله يعز المملكه والله يعلي شانها
