يا مستفز الزين كله
والجاذبية حولك تحوم
شل القمر واجلس محله
كرسيك خالي وإنته تروم

لا تلتفت حولك أهله
متناثرات وعقدك أنجوم
حسنك عجب ما فيها خله
للزين عندك صك مختوم

التاج لو تبغيه شله
من يمنعك يا فتنه القوم
دربك خضر وإنت تدله
حاشا عن الميلات محشوم

شوفك غناتي من يمله
اجلس على قلبي ولا تقوم
قلبي عروقه مضمحله
شفتك وعيني عافت النوم

تلعب وعقلي مستحله
والفكر بالأشواق مزحوم
عينك تبيح السد كله
متغطرسة وتسوي علوم

حفله غلا وشوق وتوله
وأكيد قلبي معك معزوم
يا مستفز الزين كله
والجاذبية حولك تحوم