نشد عن أحبابك وعلم من نشدك
أنا وقلبي والمعاليق ادخلا
يا مكثر الضيقات بدروبي بعدك
دنيا مهي دنياك ما فيها حلا

وين أنت دورك الخفوق ولا وجدك
ولا جاز عنك ولا استخار ولا سلا
وين أنت ما كن بوطن شوقي شهدك
وما كن صدري بالتباريح امتلا

تعال ونلم النسايم في وعدك
ما عندي أغلى من غلاك ولا غلا
ونسمي الحزات تبشر في سعدك
وندني لأدنى نبض فينا ونعلا

وعذري لعيني كلما أتلفها سهدك
عين لها خلان ما فيها بلا
ريح ملايكتك ولا تكلف جهدك
والله لا قبلك ولا بعدك ولا