تعالي نسكت أحسن من كلامٍ تاليته جروح
نحب بصمت دام الصمت ما يجرح مشاعرنا
أنا وإنتي وطول الصمت والدمعة وكثر البوح
وليلٍ ما بقى به حيل ينهانا ويأمرنا

بكى ما كنه اللي كان يغرينا فرح ومزوح
سكت ما كنه اللي كان ملهمنا وشاعرنا
توحي تسمعين الليل مدرى وش بلاه ينوح
على ضحكاتنا والا على كسرة خواطرنا

إذا يبكي من الفرحة علينا علميه يروح
وإذا يبكي حزن تكفين قولي له يسامرنا
ويجبر خاطر قامت هواجيسه تجي وتروح
يشوف الحال ويكف السؤال اللى محيرنا

صحيح إنا صبرنا واعتبرنا صبرنا مصلوح
ولكن ما بقى شيٍ عقب هذا يصبرنا
دخيل العاتق اللي له ورا ليل الجديلة ضوح
وفى جاه الشفاه اللي بنسمتها تعطرنا

وفى وجه العيون اللي بقى للدمع فيها روح
لأجل خاطر ليالينا وماضينا وحاضرنا
تعالي نسكت أحسن من كلام تاليته جروح
نحب بصمت دام الصمت ما يجرح مشاعرنا