أقول أنا بس استريح ما ينفعك دور الجريح
عنتر زمانك مستوي مرة تحب مرة تشيح
لا هي وعودك بالتزام ولا إنت بعد قد الكلام
ما عاد لك قدر ومقام بارد وأنا شوقي صريح

يا ما على الزلة سكت وإنت مكانك ما تحركت
راجعت نفسي ثم ضحكت وش لي بحبك يا مليح
ما إنت على حبّي تروم وأنا من كبار القروم
ولاني على مثلك لزوم يا مدور الدرب المريح

لو كان ذا غير الزمان وما كان به غيرك حنان
ما أبيك دام الأصل بان الحر ما عمره يطيح
كم لي تمنوا يوصلون والزين ما يأتي بهون
حنا إذا نعشق نصون يا راعي القلب الشحيح

عشقي أنا عشق الشيوخ ما فيه معنى للرضوخ
ما عاش حب بلا شموخ هذا هو الحب الصحيح
لا لا تفكر أو تقول ماني على وصلك ميول
ما دام عندك ألف قول خلك مكانك واستريح